කුවේණිය නම් වූ හෙන්රි ජයසේනයන්ගේ වේදිකා නාට්යය 1963 වසරේ නාට්ය උළෙල සඳහා ඉදිරිපත් කරන ලද්දක් ලෙස හඳුනාගත හැකිය. එහිදී මෙම නාට්යය ශෛලීගත අංශයේ,
හොඳම රචනය
හොඳම නිෂ්පාදනය
හොඳම සංගීතය
හොඳම නිළිය
සඳහා වන සම්මාන දිනා ගන්නා ලදී. මෙම නාට්යය තුළින් එදා පියවර කිහිපයක් ඉදිරියට ගමන්කොට තිබූ අපේ ජාතික කරලිය තවත් ඉදිරියට තල්ලු කළා පමණක් නොව ඉතිහාසයේ සහ ජනප්රවාදයේ ආ කතාවක් පිළිබඳ අලුත් මතයක් ද ඉදිරිපත් කළේය.
ජයසේනයන් කුවේණි නාට්යයේ කතා වස්තුව ගොඩනැගීම සඳහා යොදා ගත්තේ ලංකා ඉතිහාසය හා සම්බන්ධ ඉතා වැදගත් චරිතයක් වූ කුවේණිය හා සම්බන්ධ කතා පුවතයි. ලංකාවේ ප්රථම සිංහල රජුගේ මුල් බිසව වශයෙන් සලකන ඇය පිළිබඳව තොරතුරු සපයන මූලාශ්ර රාශියකි. 5 වන සියවසේ ලියැවුනු මහාවංශ ටීකාව, 16 වන සියවසේ ලියැවුණු කුවේණි අස්න, 18 වන සියවසේ ලියැවුණු රාජාවලිය සහ විජයරාජ කතාව තුළද මෙම පුවත අන්තර්ගත වුවද ප්රසිද්ධවූත් විශ්වාසදායකවූත් පැරණිවූත් විස්තර ඇත්තේ මහාවංශයේය.
මෙම පොත්වල කුවේණියගේ අධි මානුෂික ස්වභාවය හුවා දක්වමින් ඇය යක්ෂණියක් යන අදහස වර්ධනය කර ඇත. ජයසේනයන් කුවේණී නාට්යය සඳහා යොදා ගත්තේ ඉතිහාසයෙහි හා ජනප්රවාදයෙහි සඳහන් මෙම කතා පුවතම වුවද එහි විශේෂත්වය වූයේ ඉදිරිපත් කිරීමේ දී තිබූ අපූර්වත්වයයි. ඉතිහාස පුරාවෘත්තය තුළින් ඉතා සංකීර්ණ ජීවන අරුතක්, දර්ශනයක් ඉදිරිපත් කරයි. ඉතිහාස කතාවට අමුතු මුහුණුවරක් දීම පමණක් නොව එවැනි සාමාජික අත්දැකීම් මිහිතලය පවතින තුරා කාටත් පොදු විය හැකි බව ජයසේනයන්ගේ අදහස වීය.
